Txokoetan Oinarritutako Metodologia

Gaurkoan txokoetan antolatutako metodologiari buruz hitz egingo dizuet. Horretarako, lehenik eta behin, irakasleak galdera batzuk eman zizkigun guk erantzun genitzan.

Galderak honako hauek izan ziren:

• Zer dakizu txokoetan oinarritutako metodologiaz?
• Zer falta zaizu ikasteko?
• Zeintzuk dira atera dituzun ideia edo ikaskuntza nagusiak?

Lehenengo zein bigarren galdera gure ezagutzetatik abiatuz erantzun behar genituen, aldiz azken galdera erantzuteko irakasleak hainbat azalpen eman zizkigun aldez aurretik.

    

Lehenengo galdera erantzuteko eskolan egindako behaketan oinarritu nintzen. Eskola honetan txokoetan oinarritutako metodologia jarraitzen zuten. Baina esan beharra dago adinaren arabera txokoen antolaketa desberdina zela. 2 eta 3 urteko haurren gela bakoitza txoko bat zen eta gela batetik bestera ibiltzen ziren irakasleak adostutako ordutegia jarraituz. 4 urteko haurren txokoak aldiz, gela batean zeuden; hau da, gela bat espazio ezberdinetan banatzen zen, non, espazio bakoitza txoko bat zen, hala nola: etxe txokoa, margotegiaren txokoa, liburutegiaren txokoa, matematikaren txokoa...

Ikasteko zer falta zitzaidan galderari  erantzuteko orduan, zalantzak sortzen zizkidan hainbat faktore adierazi nituen, hala nola,  denboraren antolakuntza, metodologia nolakoa den ongi jakitea eta irakaslearen parte hartzea nolakoa izan behar den jakitea, gertukoa eta parte hartzailea edo haurrei libreki jolasean utzi behar diena.

Ondoren, irakasleak hainbat azalpen eman zizkigun eta azkenik azken galdera erantzuteari ekin genion. Lehen esan bezala, atera nituen ikaskuntza nagusiak zeintzuk ziren galdetzen zuen, nik ondorengoa ikasi nuen: eskola bakoitzak txokoak egiteko modu ezberdinak dituela, antolaketa, denbora, espazioa eta metodologiari dagokionez. Gainera haurrak antolatzeko modu ezberdinak daudela konturatu naiz, hala nola, talde egonkorrak zein talde ez egonkorrak.

Irakaslearen esku- hartzea nahiko zaila izaten dela konturatu naiz, izan ere, haurrak txokoetan libre uzten badira, irakasleari esku- hartzeko aukerak murrizten zaizkio eta oso zaila izaten da esku- hartzeko momentua aurkitzea. Baina, jolas sinbolikoaren txokoan esku- hartzeko aukera handiagoa izaten du; izan ere, txoko horretan haurrek gaur egungo gizartean ikusten diren rolak erreproduzitzen dituzte, beraz, irakasleak esku- hartzeko aukera handiagoa izango du rol horien ikuspuntua aldatzeko adibidez.

Ebaluazioari dagokionez, txokoetan errazagoa izan daiteke haurrak ebaluatzea, izan ere, talde txikietan daudela errazagoa da haurren zailtasun nahiz zaletasun eta gaitasunak behatzea edo antzematea.